NEL AULA

EL COLLACIU INVISIBLE

Nel aula d’asturianu cualaquier fecha ye bona pa facer un regalu, anque quiciabes a toos mos prestaría’l regalu de la oficialidá. Dende les navidaes a fin de cursu, pasando per cualaquier día prestosu, xustifica la posibilidá de camudar presentes ente los alumnos. Baxo esti prisma, el collaciu invisible ye un xuegu que se puede entamar nel aula y qu’atopámos na vida diario.

¿Qué vamos regalar?

Caún tien d’iguar en clas un regalu imaxinariu: el so nome, de qué ta fechu, la so apariencia, pa qué sirve, ónde s’emplega…; depués de too ello, tien de dibuxalu y escribir en llimpiu too al rodiu d’él. Yá ta fecho, agora a ver a quién se-y da.

¿A quién se fae´l regalu?

Pue facese de milenta formes, pero nesti casu’l maestru tien de decidir pa que les pareyes casen acordies ún sofite al otru, que nun seya aleatoriu sinón que sirva p’afondar na llingua.

¿Cómo s’entreguen?

Al dibuxu y desplicación fechos enantes, súmase’l nome de la persona a la que se fae’l regalu. Les fueyes pónense toes nuna mesa y caún tien de recoyer la que-y tocó. Depués tien de lleer bien el so regalu n’altu pa toos.

Aldovinar cuál ye’l to collaciu invisible

Pa ser a ello, l’alumnu tien de facer entrugues de si o non a los sos compañeros de clas: ¿el to regalu ta fechu de madera? ¿el to regalu ye mariellu y azul?... Cuando camienta que yá lo sabe, faerá entrugues más particulares a la persona o persones que cuida que son los sos amigos invisibles. El maestru faerá entamar a aldovinar a los alumnos con más soltura pa que los otros seyan a ver cómo ye. Acordies salgan, queden menos posibilidaes y ye más fácil aldovinar. El caberu, como tien el trabayu fechu, tien de face-y entrugues al so collaciu sobre´l llugar onde lu mercó y aldovinalu.

Correxir



Una vegada fechu, toca correxir les faltes qu’haiga nel escritu del to collaciu invisible. Tienes de lleelu con procuru delles vegaes y poner correutamante aquello que cuides que ta mal. El maestru pue llevar p’alantre otres menes de correxir: sorrayar les faltes pa que los neños seyan a correxiles, dicir la triba faltes qu’hai y ellos tienen de correxilo, lleer fras a fras y dicir que-yos paez que ta mal…

Y esto ye too. Pues face-y les añadidures que camientes más correutes pa meyoralu o adautalu al grupu o nivel. Hasta la prósima.

COSES DE CORDOBELLO

NOPSÓI

Pindiu como la escalera de la torre d’un castiellu, Nopsói tien tres cordales: ún siguíu d’otru. Nes sos llendes nun s’alcuentra denguna ciudá y los pueblos empericótiense na llucha de cuál ta más altu. La capitalidá del conceyu va camudando de pueblu en pueblu acordies la faya más alta s’alcuentre nun llugar o otru. El gobiernu atópase nel picu más altu de tol conceyu, onde se llevanta un palaciu nel que descansa’l Llibru les Soluciones.

Dende hai dellos años afuégalos un problema que naide nun ye a solucionar y les marmuraciones entamen a ser glayíos a la escontra’l llibru. Un mozu, que malapenes tien dieciséis años, entruga cómo ye posible que les fayes enanchen y amenorguen en díes y por embargu tarden tanto en medrar.

Callen como afogaos, nun reconociendo nengún el tener fecho trampa: el dir pela nueche a serruchar los árboles de los vecinos. Toos baxen la cabeza, aperten los llabios y amiren pa otru llau. La so sapiencia de sieglos va ser llanzada al llagu más fonderu del conceyu nun actu coleutivu nel que se va amosar la so inutulidá.

El Llibru les Soluciones desapaez enantes que lu estrocen. Toos dexen pa prau’l so esanicie, medranosos de que descubran la so trampa.

Nomáu por toos, un Conseyu de Muyeres Sabies queda en facer l’entamu d’otru llibru que dé soluciones. Axúntense en palaciu al fueu''l llar. Enantes de ponese col  llabor, y siguiendo vieyes costumes, saborguiaron una llacuada de la que remembraben n'años. En finando, falaron abondo al respeutu de cómo entamar la so xera. Tando escoyendo les primeres pallabres, el rapazu preséntase delantre elles, táscase na oreya drecha y marmura de la que garra una mazana sobrante:

-Trabayu fatu onde los haiga, facer lo que ta fechu.

Les muyeres amíranlu, gárrenlu y entamen rexistralu. Nun lleva nada enriba.

-Hai munchos años que nun miráis nin pal llibru. ¿Sabéis cómo ye?

Nun hai denguna rempuesta. Nin el más vieyu de Nopsói remembra la color del llibru. Naide nun lu consultó en sieglos.

-Ehí ta, al vuesu llau. Ye l’unicu llibru ensin lletres de tola biblioteca. Ta asperando que lu escribáis pero la galbana fae que nun seyáis a ello.

El rapazu garra un llapiz y traza delles pallabres: Un pueblu ensin dignidá ye como un llibru ensin lletres.

L’arguyu de Nopsói, el Llibru les Soluciones, yá ta estrenáu. Asperemos que nun pasen más sieglos enantes de la so siguiente escritura.

LLINIES

CARNÉ DE CONDUCIR CARRICOCHES

Toles mañanes camino abondo na ciudá: dir a los fisios, mercar dalgo, tomar l’aire,… Col mio coxiquéu acompasáu paso tiendes, places, parques,… , hasta llegar al mio destín. Per metanes d’ello, cruzo semáforos que malpenes te dan tiempu a pasalos, preparaos pa los non discapacitaos, pa la xente que se da abayu y que nun anda torgao pela vía como andamos los que tenemos dalguna tara social. Ente un llugar y otru, raru nun ye cruciase con un carricoche que lleve a un neñín, siempres allegrando la vida. Ye una pena qu’al par d’él vaiga otra persona que se piense con tolos drechos nes aceres y pasos de cebra a cortate’l pasu, nun dexate sitiu a esgaya per onde pasar, date viaxes que nun veas,… Nun miran pa nada nin pa nadie, piénsense cola patente corsu a pasar per delantre discapacitaos, xente trabayando que lleve dalgo de pesu, xente mayor cola movilidá descompensada,… Un día, téngolo que dicir, pillóme un carricoche; sí, sí, oyístelu bien, pillóme un carricoche de la que volvía del fisio. Diba tranquilín pela acera, ancha a mamplen, cuando noté na mio pierna drecha, llau onde tengo la emiplegia, dalgo que m’emburriaba dende atrás. Miré. Yera un carricoche. El so conductor glayábame dalgo al respeutu de que m’apartare, que taba molestando, y ye que los discapacitaos tamos na cai solo pa estorbar. Pa enriba pillame, móntame una barrila por entorpecer los sos privilexos. En fin, que cola importancia que tienen, nun taría de más que-yos dieren un carné de conductor de carricoches, eso sí, pasando enantes un esamen de capacitación.

LLINIES

DE DALGUNA FORMA HABÍALA D’ENTAMAR

Nestes llinies voi selmana a selmana escribir al rodiu de lo qu’asocede averáu a min: porque té cerquina o porque salga nos medios de comunicación. Na mio tiesta abeyaron idegues a baruyu y cada vegada qu’atopaba una nueva imaxinaba que yera la meyor y más afayadiza. El casu ye que nun daba entamao, asina que dixe: acabóse, voi facelo polo más xeneral, polo fartucu que toi de que se rían de nós los políticos, entendiendo por nós la pallabra ASTURIANOS.

Naguaba porque fueren unes llinies y lo qu’esa xente se tien reído de nós ye muncho más, nun yera cosa de llantavos un testamentu, nun blog eso ye imperdonable; predicazaña y llarga: doble pecáu. Voi facevos una entruga: ¿Visteis a dalgún políticu facer con amor dalgo p’Asturies? La mio rempuesta ye que non, que faenlo por clientelismu o porque ye meyor pa Madrid. Dende qu’entamó l’autonomía, Asturies nun meyora nin un rispiu: de culu y ensin frenos que diríen otros. Dengún partíu que tuviere na Xunta s’esmoleció por facer que la nuesa tierra medrare y la so xente ameyorare nes sos condiciones, namái calentaben los sos asientos y meyoraben la so situación. Pero tamién hai partíos de fuera la Xunta que nun respuenden más qu’a los sos intereses: unos fechos agora y otros de rancia estraparlamentariedá. Asturies necesita esconsonar, estirase un pocoñín y llibrase d’esa gandaya. Tenemos d’entamar por pensar n’asturianu: meyorar la nuesa economía y emplegu, enanchar la nuesa sanidá y educación, acuriosar les nueses comunicaciones, llograr una autonomía de verdá, pegar un emburrión a la nuesa cultura y llingues: asturianu y fala, … De xuru que toos tenemos dalgo de dicir, pero nun mos dexen col so marabayu de democracia, paez que con nomala ye a esgaya, non señores, nun insulten a la democracia, ustedes lo que tienen ye una partidocracia, nós lo que deseyamos ye una DEMOCRACIA. Queremos llevantanos una mañana y tornar a sentir arguyu de ser asturianos, nun sentir a la nuesa tierra como l’entamu del pecáu orixinal, nun saber que los sos políticos la traten con vergoña porque no más fonderu de les persones ta la mediocridá: non na nuesa cultura y llingües, non nos nuesos pueblos, non na nuesa historia; pa ello hai que baltiálos, ¿vamos ser a ello o vamos siguir cola so partidocracia?

En tol mundiu árabe hai llevantamientos pidiendo llibertá, nós, n’Asturies, namái mos llevantamos pa dir al escusáu asperando tener llibertá a esgaya pa obrar.

COSES DE CORDOBELLO

VOROLÓI

Vorolói ye un conceyu mui averáu a les sos tradiciones. “Cúntense tantes como pueblos son” dicen, pero nun tán no cierto. Hai una tradición común a tol conceyu y que vien de vieyo. Nes dómines nes que naide nun s’alcuerda, aportaba un día nel añu en que toos teníen de preñar a les sos tierres. En cada familia escoyíase al fíu primoxénitu que tenía d’acariñar a lo llargo’l día les güertes y na nueche chucase con elles. Cuanto meyor les mingaba, meyor collecha sacaba. Na xornada del día depués entamábase una llacuada na que l’home recuperaba les fuercies.

Los “Calcetos” yera una afamada familia que llograba les meyores colleches y per ende axuntaben los meyores manxares pal día siguiente. Na historia familiar remembrase con munchu ciñu a un “calcetu” qu’algamó lo que naide ficiere hasta entós. Cucara tanto a una güerta que la dexare asperando descendencia. Mentanto lu concebía y non surdieron de les sos fondures los frutos más dolces y grandes que naide nun yera a tastiar. El “Calcetu” acuriosábala y agasayábala como d’una muyer se tratare. Dába-y chuchos y nun había nueche que nun l'amoreciere. El silenciu de dambos llogró sacar a la vida a un neñu guapu guapu y llistu. Fo’l “Fíu de la Tierra”. D’él y la so descendencia siempres fueron les capacidaes de curar a tolos seres de la naturaleza.

D’entós p’acó, esi día tresformóse nuna selmana y tolos machos de la familia tienen d’agasayar a les femes y les sos tierres. Na tiesta de toos ta’l llograr que naza otru Vorolói, pero asina sólo se llograron llamar pá y fíu. Enantes nun hebio otros y depués de mamo non, cada vez que se quier nomar a dalguién asina, tresfórmase en fema el fetu.